Störf mannsins hjá ráðuneytinu auðvelduðu honum ekki smyglið

Baldur Guðlaugsson, ráðuneytisstjóri í fjármálaráðuneytinu staðfestir við Vísi að starfsmaður ráðuneytisins sé bendlaður við smygl á tæpum fimm kílóum á amfetamíni og 600 grömmum af kókaíni. Tollgæslan lagði hald á efnin sem komu með hraðsendingu og er málið litið alvarlegum augum þar sem Tollgæslan heyrir undir fjármálaráðuneytið. Störf mannsins í ráðuneytinu tengdust þó tollgæslunni ekki á nokkurn hátt.

„Það liggur fyrir að starfsmaður ráðuneytisins blandast inn í málið," segir Baldur Guðlaugsson. „Í sjálfu sér vitum við ekki mikið um málavöxtu en starfsmaðurinn fæst ekki við nein þau mál innan ráðuneytisins sem gætu auðveldað honum brot af þessu tagi," segir Baldur.

Hann segir því ólíklegt að farið verði yfir verkferla og öryggismál innan ráðuneytisins vegna málsins en engar ákvarðanir hafi verið teknar um málið. „Það er engin tenging á milli þess sem maðurinn er að fást við og þess sem hann er grunaður um. Hann var því ekki að nýta sér stöðu sína innan ráðuneytisins á nokkurn hátt," segir Baldur Guðlaugsson, ráðuneytisstjóri fjármálaráðuneytisins í samtali við Vísi.