Láku drögum að frumvarpi til að hafa áhrif

Bárður Ragnar Jónsson, formaður Breiðavíkursamtakanna, segist ekki hafa rofið trúnað með því að leka drögum að frumvarpi um sanngirnisbætur til handa Breiðavíkurdrengjum til fjölmiðla.

Frumvarpið er enn í smíðum og var afhent Breiðvíkursamtökunum til umsagnar gegn því að samtökin virtu trúnað um innihald frumvarpsins.

Samtökin kynntu hins vegar efni frumvarpsins í gær og ræddu það í fjölmiðlum. Það var gert þrátt fyrir að frumvarpið sé enn í vinnslu og hafi hvorki verið kynnt í þingflokkum né í ríkisstjórn.

Forsætisráðuneytið sendi svo frá sér yfirlýsingu í dag þar sem lekinn er harmaður.

Formaður Breiðavíkursamtakanna viðurkennir að hafa samþykkt trúnaðarskilmála ráðuneytisins. En segir jafnframt að sá trúnaður hafi fallið úr gildi þegar ekki var komið til móts við fjölamargar athugasemdir samtakanna.

Samtökin ákváðu því að leka frumvarpinu í fjölmiðla.

Bárður segir að það hafi verið gert í von um að umræða um efni þess yrði til þess að koma að þeim breytingum á frumvarpinu sem Breiðavíkursamtökin berjast fyrir.

Breytingum sem til þessa hafa ekki hlotið hljómgrunn hjá ráðuneytinu.

Bárður segir að ráðuneytið sé í "pínulítilli fýlu" yfir lekanum en minnir á að félagsmenn hafi verið afar ósáttir við drögin að frumvarpinu og óskað eftir aðgerðum.

Þess vegna hafi verið nauðsynlegt að grípa til þess að leka þeim til fjölmiðla.

Spurður hvort hann sé bjartsýnn á að þetta útspil samtakanna heppnist svarar Bárður.

"Viðbrögð forsætisráðuneytisins gefa nú ekki tilefni til mikillar bjartsýni. En við skulum sjá til."