Undirskriftalistar afhentir í vikunni

Undirskriftalistar íbúa í Norðlingaholti gegn fyrirhuguðu áfangaheimili sem stefnt er að hefji starfsemi í haust í Hólavaði 1 til 11 verða afhentir borgaryfirvöldum á miðvikudaginn.

Styr hefur staðið um áfangaheimilið í borgarstjórn og samkomulag sem gert var við Heilsuverndarstöðina um rekstur þess.

Hafsteinn Þór Eggertsson, íbúi í hverfinu og einn skipuleggjanda undirskriftasöfnunarinnar, segir að yfir 200 manns hafi nú þegar skrifað undir listana. ,,Það verður að teljast bara nokkuð gott þar sem ein mesta ferðahelgi sumarsins var einmitt um helgina," segir Hafsteinn.

Hafsteinn segir verktaka sammála íbúum í hverfinu. ,,Þeir eins og við íbúarnir teljum að heimili af þessari stærðargráðu muni lækka verðgildi fasteigna á svæðinu. Íbúar úthverfa sækja eftir öryggi og næði," segir Hafsteinn.

Í kvöld ætla aðstandendur söfnunarinnar að ljúka við að ganga hús úr húsi og safna undirskriftum. Á miðvikudaginn hyggst hópurinn afhenda borgaryfirvöldum listana og koma skoðunum sínum á framfæri.