Verðmæti útfluttra sjávarafurða jókst um þrjú prósent

Verðmæti útflutningsframleiðslu sjávarafurða nam 127 milljörðum króna á síðasta ári og jókst um tæp þrjú prósent frá árinu á undan. Þetta kemur fram í nýju riti Hagstofunnar.

Framleiðslan mæld á föstu verði dróst hins vegar saman um 2,3 prósent. Útflutt afurðaverðmæti allra aflategunda nema skel- og krabbadýrum og flatfiski jókst frá fyrra ári. Líkt og árið áður skiluðu frystar afurðir um helmingi útflutningsverðmætis.

Tölur Hagstofunnar sýna enn fremur að af heildarútflutningi sjávarafurða fóru 80 prósent til Evrópska efnahagssvæðisins, um 6 prósent til Norður-Ameríku og önnur sex prósent til Asíu.