Umhverfisráðherra ekki samþykkur eignarnámi við Þjórsá

Þórunn Sveinbjarnardóttir umhverfisráðherra segist ekki samþykk því að eignarnámi verði beitt við Þjórsá til þess að Urriðafossvirkjun verði að veruleika. Þetta kom fram í svari hennar við fyrirspurn Atla Gíslasonar, þingmanns Vinstri - grænna. Þá sagði ráðherra að forstjóri Landsvirkjunar hefði ekkert umboð frá ríkisstjórninni til eignarnáms þótt hann héldi því fram.

Atli vakti athygli á því að meirihluti kosningabærra íbúa á vesturbakka Þjórsár í Flóahreppi hefði skorað á sveitarstjórnina að endurskoða þá ákvörðun að setja Urriðafossvirkjun inn á aðalskipulag sveitarfélagsins. Þá hefðu allir jarðeigendur nema einn á áhrifasvæði Urriðafossvirkjunar á austurbakka Þjórsár undirritað yfirlýsingu þar sem þeir lýstu sig andsnúna því að virkjunin verði byggð. Benti Atli á að eignarnáms væri þörf til þess að virkjunin yrði að veruleika. Spurði hann því hvort fyrir lægi stuðningur ríkisstjórnarinnar við eignarnám í málinu.

Þórunn Sveinbjarnardóttir sagðist telja að það væri hlutverk sveitarstjórnarmanna að hlusta á og taka tillit til óska íbúa. Sveitarfélögin Færu með skipulagsvaldið og þeim bæri að fara varlega með það og huga að framtíðinni. Ekki hefði verið samþykkt í ríkisstjórn að Landsvirkjun fengi heimild til eignarnáms vegna virkjunarinnar og hún væri sjálf ekki samþykk því að eignarnámi yrði beitt. Sagðist hún ekki sjá neina þá almannahagsmuni í húfi að færa mætti rök fyrir eignarnámi. Enn fremur benti hún að breyting hefði orðið á stjórn Landsvirkjunar og þar væru nú tveir fulltrúar Samfylkingarinnar.