Almenningur á ekki að borga skuldir bankanna

,,Þegar viðskiptabankarnir voru einkavæddir hætti ríkið að eiga þá," segir Kristinn H. Gunnarsson, þingmaður Frjálslynda flokksins, í pistli á heimasíðu sinni og bætir við að þá hafi ríkið hætt að bera ábyrgð á skuldum bankanna, skuldbindingum og öðrum ákvörðunum.

Með einkavæðingunni fluttist eignarhald og ábyrgð frá ríkinu og þjóðinni til nýrra eigenda hlutafjárins. Eftir einkavæðinguna ber ríkið ekki ábyrgð á skuldunum og er það kjarni einkavæðingarinnar, að mati Kristins.

,,Einstaklingarnir sem við tóku eignarhaldi og rekstri bankanna gera það á sína ábyrgð. Þeir öxluðu fúslega ábyrgð sína meðan vel gekk og rétt er að þeir geri það áfram þegar illa gengur," segir Kristinn.

Kristinn segir að þegar Alþingi greip inn í með lagasetningu fyrir rúmum tveimur vikum var það ekki til þess að færa yfir á ríkið ábyrgðina af skuldum bankanna heldur til þess að tryggja að unnt yrði að halda áfram bankarekstri innanlands.

Pistil Kristins H. Gunnarssonar er hægt að lesa hér.