Reyna að blekkja fé af afgreiðslufólki

Lögreglan varar afgreiðslufólk verslana og banka við bífræfnum mönnum af erlendum uppruna sem notað hafa blekkingar til að ná peningum af starfsfólki.

Í tilkynningu lögreglunnar segir að að í síðustu viku hafi nokkrir útlendingar komið inn verslun með nokkra fimm þúsund seðla sem þeir lögðu á afgreiðsluborðið og báðu starfsmann að skipta þeim í eitt þúsund krónu seðla. Rugluðu þeir síðan öllu saman og hættu við að láta skipta fyrir sig. Í öllum ruglingnum tóku þeir hluta af eins þúsund króna seðlunum og settu með þeim peningum sem þeir komu með. Þannig náðu þeir að svíkja fé út úr nokkrum verslunum.

Sams konar tilvik kom upp í banka og fyrirtæki á Suðurnesjum í gær og þá var tilraun gerð til hins sama í matvöruverslun í Garðabæ nýverið. Lögregla segir að hér gæti verið um sömu eða tengda aðila að ræða í öllum tilvikunum og vakni grunur um að framangreind lýsing gæti átt við er fólk vinsamlegast beðið að láta lögregluna vita.