Lokaspretturinn í Baugsmálinu hafinn

Lokasprettur Baugsmálsins hófst í Hæstarétti í morgun, en þangað var áfrýjað dómum sem Jón Ásgeir Jóhannesson, Tryggvi Jónsson og Jón Gerald Sullenberger hlutu í héraðsdómi fyrir ári.

Málflutningur í Baugsmálinu stóð í Hæstarétti í allan dag en málið sjálft á sér hátt í þriggja ára sögu í dómskerfinu.

Upphaflega var ákæran í 40 liðum, fyrir stórfelld brot og kom málið til kasta Héraðsdóms Reykjavíkur í ágúst 2005. Ákærunni í heild var vísað frá. Það var kært til Hæstaréttar, sem lagði fyrir héraðsdóm að fjalla um 8 liði, sem sýknaði í þeim öllum. Sex ákæruliðum var áfrýjað, en Hæstiréttur staðfesti sýknudóminn í janúar á síðasta ári. Þar með var upphaflega málið komið á endastöð.

Þar með var ekki öll sagan sögð. Settur saksóknari endurákærði, núna í 19 liðum. Veigamesta liðnum, sem laut að meintum svikum vegna kaupa á 10-11 verslunarkeðjunni, var vísað frá og voru þá eftir 18 og tók héraðsdómur þá fyrir í janúar á síðasta ári.

Skilorðsbundnir dómar féllu í maí, þar sem Tryggvi var dæmdur í 9 mánaða fangelsi og Jón Ásgeir í 3 mánaða fangelsi. Alls var sakfellt í fjórum ákæruliðum en fjórtán ákæruliðum var ýmist vísað frá eða sýknað í þeim en máli Jóni Geralds var vísað frá. Frávísun tíu ákæruliða var kærð til Hæstaréttar, sem sendi þá í hérað aftur. Dómur féll í júní í fyrra, þar sem Tryggvi fékk 3 mánuði til viðbótar, en Jón Ásgeir sýknaður. Jón Gerald fékk 3 mánaða skilorðsbundinn dóm. Málinu var svo öllu vísað til Hæstaréttar þar sem málflutningi lýkur á morgun. Stefnt er að því að Hæstiréttur felli dóm innan þriggja vikna frá þeim tíma.