Orustuþotur á flugsýningu í Reykjavík

Mirage orustuþotur franska flughersins taka þátt í flugsýningu á Reykjavíkurflugvelli um aðra helgi en sýningin verður sú viðamesta sem haldin hefur verið hérlendis um árabil og hápunktur Flugviku, sem hefst í Reykjavík á sunnudag.

Flugmálafélag Íslands stendur að hátíðinni ásamt helstu aðilum tengdum flugi á Íslandi. Ýmis flugatriði verða í boði í borginni þessa viku, meðal annars fallhlífastökk, flugmódelflug, hópflug og listflug.

Þá munu farþegaþotur Icelandair fljúga yfir borginni sem og gamli þristurinn Páll Sveinsson og flugsveit Landhelgisgæslunnar verður með sýningaratriði.