Halli á rekstri hins opinbera í fyrsta sinn í fjögur ár

Tekjuafkoma hins opinbera reyndist neikvæð um nærri tvo milljarða króna á öðrum ársfjórðungi þess árs. Þetta kemur fram á vef Hagstofunnar.

Þettar er verulega óhagstæðari afkoma en á öðrum ársfjórðungi 2007 en hún var þá jákvæð um nærri 12 milljarða. Sem hlutfall af landsframleiðslu var tekjuhallinn 0,1 prósent og sem hlutfall af tekjum hins opinbera 1,2 prósent. Fara þarf aftur til þriðja ársfjórðungs 2004 til að finna neikvæða afkomu í rekstri hins opinbera. Þessi óhagstæða afkoma skýrist af bæði neikvæðri tekjuafkomu ríkissjóðs og sveitarfélaga, en afkoma almannatrygginga var hins vegar jákvæð á umræddum ársfjórðungi.

Fram kemur á vef Hagstofunnar að tekjur ríkissjóðs hafi hækkað um 1,3 prósent á öðrum ársfjórðungi 2008 frá sama ársfjórðungi 2007 en þær lækkuðu hins vegar um 4,6 prósent frá fyrsta ársfjórðungi þessa árs eða um 5,4 milljarða króna og munar þar mestu um lækkun skatttekna af vöru og þjónustu.

Á sama tíma hækkuðu útgjöld ríkissjóðs um nærri 14 prósent milli ára og um rúm 10 prósenta á milli fyrsta og annars ársfjórðungs 2008. Munar þar miklu um aukna fjárfestingu ríkissjóðs og aukin fjárframlög til almannatrygginga.