Skipulagsstjóri segir upplýsingar Remax villandi

Arinbjörn Vilhjálmsson, skipulagsstjóri Garðabæjar segir að fasteignasali Remax hafi gefið villandi upplýsingar um hvað sé mögulegt að gera á 3600 fm eignarlóð sem Vísir fjallaði um í gærdag.

Málið vakti mikla athygli enda ásett verð lóðarinnar hálfur milljarður króna.

Samkvæmt deiliskipulagi Arnarness er byggðin skilgreind sem einbýlishúsabyggð þar sem hús eru einnar hæðar og geta verið á kjallara gefi landslagshalli tilefni til.

"Á auglýsingu fasteignastofunnar má skilja að heimilt sé að reisa risastórt einbýlishús á tveimur hæðum og að tvær lóðir ásamt byggingarreitum geti sameinast í eina.

Þessar upplýsingar eru afar villandi svo vægt sé til orða tekið enda í miklu ósamræmi við það skipulag sem er í gildi á Arnarnesi. Teljast verður afar ósennilegt að tillögu eins og gefin er skyn í auglýsingunni yrði nokkru sinni hleypt í grenndarkynningu af skipulagsnefnd bæjarins.

Hinsvegar ef að lóðarhafi hefur áhuga á að byggja eitt hús á öðrum hvorum byggingarreit lóðanna væri það athugandi á meðan að það væri í samræmi við ákvæði þess deiliskipulags sem í gildi er á Arnarnesi," segir skipulagsstjóri

Arnbjörn Arason, fasteignasalinn sem hefur umsjón með sölu lóðarinnar sem um ræðir segir að fullt samráð verði haft við skipulagsstjóra og ekkert verði byggt á lóðinni nema með leyfi skipulagsyfirvalda.