Fjögurra mánaða fangelsi fyrir að dælda bíl

Karlmaður var í Héraðsdómi Reykjavíkur í dag dæmdur í fjögurra mánaða skilorðsbundið fangelsi fyrir að valda skemmdum á bifreið.

Maðurinn var ákærður fyrir að hafa bæði sparkað og slegið með barefli í hægri hlið bifreiðarinnar þannig að hún dældaðist. Eignaspjöllin vann hann í félagi við annan mann eftir rifrildi við þriðja mann og segir í dómnum að svo miklar skemmdir hefðu verið unnar á bílnum að tryggingafélag mat hann ónýtan.

Maðurinn neitaði að hafa lamið bílinn með barefli og út frá misvísandi framburði vitna taldi dómarinn skorta á að lögfull sönnun væri fram komin um það. Hins vegar var hann út frá framburði vitna sakfelldur fyrir að dælda hægri hlið bifreiðarinnar með því að sparka í hana.

Maðurinn á að baki nokkurn sakaferil og var tekið tillit til þess við ákvörðun refsingar og þess að viðbrögð mannsins í aðstæðunum væru langt umfram það sem efni stóðu til.