D´Angleterre sagt eitt besta hótel í heimi

Á meðan danskir fjölmiðlar hamast á íslenskum viðskiptamönnum þá er hótelið D´Angleterre sem er í eigu íslendinga að slá í gegn. Viðurkenningarnar hrannast upp og er hótelið m.a. talið eitt það besta í heimi.

Danska viðskiptadagblaðið Börsen birti stóra úttekt á veitingastað hótelsins um síðustu helgi. Gagnrýnandi blaðsins hleður staðinn lofi og telur hann einn af fimm bestu veitingastöðum Danmerkur.

D´Angleterre er í eigu fjárfestingarfélagsins Nordic Partners en stærsti hluthafinn þar er Gísli Þór Reynisson. Í úttekt Börsen er sérstaklega talað um hve veitingastaðurinn hefur bætt sig síðan íslendingarnir tóku við.

Bandaríksta fjármálatímaritið Institutional Investor hefur einnig mikið dálæti á hótelinu og setur það á lista sinn yfir hundrað bestu hótel í heimi. Er þetta í fyrsta skipti sem danskt hótel kemst á þann lista.

Ferðamálatímaritið Diavara velur D´Angleterre besta hótelið í Danmörku  og samtöku stærstu ferðamálasamtaka heims taka í sama streng og velja hótelið það besta fjórða árið í röð. Konunglega svíta hótelsins er einnig valin besta svítan í Danmörku.