Coen bræður sigursælir

Coen bræður komu sáu og sigruðu á áttugustu Óskarsverðlaunahátíðinni sem fram fór í Kodak leikhúsinu í Hollywood í nótt.

Mynd þeirra, No Country for Old Men, vann alls fern verðlaun, flest allra mynda. Sjálfir fóru bræðurnir heim með þrjár styttur, fyrir bestu myndina, besta leikstjórn og besta handritið byggt á áður útgefnu efni.

Bræðurnir hafa áður verið tilnefndir til Óskarsverðlauna fyrir leikstjórn og bestu mynd, en þetta er í fyrsta sinn sem þeir hreppa hnossið. Þeir fengu verðlaunin fyrir besta handrit árið 1996 fyrir kvikmynd sína Fargo.

Daniel Day Lewis var valinn besti leikarinn í aðalhlutverki fyrir There Will Be Blood, og hin franska Marion Cotillard besta leikkonan í aðalhlutverki fyrir La Vie en Rose. Í aukahlutverkum hrepptu hnossið Þau Tilda Swinton fyrir hlutverk sitt í Michael Clayton og Javier Bardem fyrir No Country For Old Men.

No Country for Old Men og There Will Be Blood voru tilnefndar til flestra verðlauna, átta hver. There Will Be Blood hlaut tvenn verðlaun, fyrir bestu myndatöku og besta leikara í aðalhlutverki.

Kvikmyndin Michael Clayton fylgdi fast á hæla þeirra með sjö tilnefningar, en hlaut einungis ein verðlaun, fyrir bestu leikkonu í aukahlutverki.