Ýja að stuðningi við sjálfstæðiskröfu Suður-Ossetíu og Abkasíu

Rússnesk yfirvöld gáfu til kynna í dag að þau muni hugsanlega styðja kröfu héraðanna Suður-Ossetíu og Abkasíu um aðskilnað frá Georgíu ef Vesturveldin lýsa yfir stuðningi við Kosovo.

Talið er hugsanlegt að Kosovo-Albanar lýsi yfir sjálfstæði frá Serbíu á næstu dögum en mál héraðsins hefur verið bitbein Rússa og Serba annars vegar og vestrænna ríkja hins vegar undanfarin ár. Reiknað er með að bæði Bandaríkjamenn og Evrópusambandið muni viðurkenna Kosovo sem sjálfstætt ríki þegar og ef yfirlýsingin kemur.

Suður-Ossetía og Abkasía tilheyra nú Georgíu og í tilkynningu frá utanríkisráðuneyti Rússlands segir að þarlend yfirvöld verði að taka tillit til yfirlýsinga Kosovo-Albana í málefnum héraðanna tveggja.

Sergei Lavrov, utanríksráðherra Rússlands hitti nýverið leiðtoga Suður-Ossetíu og Abkasíu í Moskvu en mikill stuðningur er við aðskilnað frá Georgíu í báðum héruðunum. Stjórnvöld í Georgíu saka hins vegar Rússa um að styðja héruðin í baráttu sinni til þess að grafa undan tilraunum Georgíumanna til að byggja upp sterkt, sjálfstætt ríki. Því hafna Rússar.