Sjávarútvegsráðherra vill halda fiskvinnslu í landinu

Einar K. Guðfinnsson, sjávarútvegsráðherra segir að leita verði leiða til að halda fiskvinnslu í landinu. Hann segir útflutningsálagið, sem afnumið var í september í fyrra, ekki hafa gert það gagn sem vonast var til.

Þann 1. september síðastliðinn féll úr gildi 10 prósenta álag sem greitt var vegna útflutnings á gámafiski frá Íslandsmiðum. Álagið gerði það að verkum að aukalega dróst frá kvóta útgerða sem fluttu fiskinn óunninn úr landi. Starfsgreinasambandið og samtök fiskvinnslu án útgerðar hafa gagnrýnt að álagið hafi verið afnumið um svipað leiti og þorskkvótinn var skorinn niður. Fjöldi þeirra sem hefur misst vinnuna síðan kvótaskerðingin var ákveðin er 456 og um 120 til viðbótar búa við lokanir. Á sama tíma hefur útflutningur á óunnum fiski aukist.

Þegar tölur Fiskistofu eru skoðaðar sést að aukningin nemur um 11 prósentum á fyrstu fjórum mánuðum þessa fiskveiðiárs miðað við sama tíma árið 2006. Þar vegur þyngst aukning á útflutningi óunninar ýsu sem nemur 32 prósentum og þorsks um 13 prósent. útflutningur á karfa og steinbít dregst hins vegar saman.

Þetta sést best þegar tölur fiskistofu frá árinu 2005 eru bornar saman við árið 2007. Þá sést að í heildina hefur útflutningur á óunnum botnfiski dregist saman á þessu tímabili og þegar einstakar fisktegundir eru skoðaðar sést að aðeins er aukning á útflutningi á óunninni ýsu. Einar segir útflutningsálagið ekki hafa stuðlað að því að fiskurinn væri unnin hér á landi og því hafi hann sett á laggirnar nefnd sem ætlað er að leita leiða til að halda fiskvinnslunnni hérlendis