Á endanum framkvæmdavaldið sem skipar dómara

Umdeild skipan héraðsdómara á Norðurlandi eystra kom enn til umræðu á Alþingi í morgun þegar forsætisráðherra var spurður út í það álit Dómarafélags Íslands að vinnubrögð Árna M. Mathiesens, setts dómsmálráðherra, væru til þess fallinn að draga úr sjálfstæði dómstóla.

Fyrirspyrjandi, Árni Þór Sigurðsson, vildi reyndar í óundirbúnni fyrirspurn til forsætisráðherra fá nákvæmar tímasetningar á því hvenær Árni Mathiesen hefði verið settur sem dómsmálaráðherra í málinu og hve langan tíma hann hefði tekið til að skoða og afgreiða málið.

Geir H. Haarde sagði fáránlega spurningu að ætlast til þess að hann hefði á takteinum einstakar dagsetningar um þetta efni en sagði að menn hefðu það kerfi hér, hvort sem mönnum líkaði það betur eða verr, að það væri á endanum framkvæmdavaldið sem skipaði dómara. Það bæri að gera það eftir bestu samvisku og á grundvelli bestu fenginna upplýsinga en á endanum væri það mat ráðherra sem hlyti að ráða.

Geir H. Haarde spurði þá hvernig það gæti veikt sjálfstæði dómstóla að skipa mann sem dómnefnd hafi metið hæfan. „Línan liggur þar sem dómnefndin sker á milli hæfra og óhæfra. Í þessu máli var enginn metinn ekki hæfur," sagði Geir.