Geir á fund ESB-toppa

Geir H. Haarde forsætisráðherra heimsækir Lúxemborg og Belgíu í síðari hluta febrúar til viðræðna við forsætisráðherra ríkjanna. Hann mun einnig eiga viðræður við fulltrúa í framkvæmdastjórn Evrópusambandsins og framkvæmdastjóra Atlantshafsbandalagsins.

Fram kemur í tilkynningu frá forsætisráðuneytinu að ráðherra fundi með Jean-Claude Juncker, forsætisráðherra Lúxemborgar, í hádeginu 26. febrúar og þá mun hann einnig kynna sér starfsemi íslenskra fjármálafyrirtækja í hertogadæminu sama morgun.

Þaðan fer forsætisráðherra til Belgíu og mun 26. - 27. febrúar eiga fundi með Guy Verhofstadt, forsætisráðherra Belgíu, Jaap de Hoop Scheffer, framkvæmdastjóra Atlantshafsbandalagsins, Jose Manuel Barrosso, forseta framkvæmdastjórnar Evrópusambandsins, Javier Solana, utanríkismálastjóra ESB, Benitu Ferrero-Waldner, framkvæmdastjóra ESB á sviði utanríkismála, og Olli Rehn, framkvæmdastjóra ESB á sviði stækkunarmála.