Ákvörðun um Sundabraut í fyrsta lagi næsta haust

Samgönguráðherra segist fyrsta lagi getað tekið ákvörðun um framkvæmdir við Sundabraut næsta haust. Framkvæmdir ættu þó að geta hafist á næsta ári.

Tvær leiðir hafa aðallega verið ræddar vegna lagningu Sundarbrautar. Annars vegar hin svokallaða eyjaleið, sem Vegagerðin styður, og hins vegar gangaleiðin sem felst í því að leggja brautina í jarðgöng undir Elliðarárvog, frá Kleppsvík að Gufunesi.

Borgaryfirvöld hafa lagt áherslu á að sú leið verði farin en hún er talin vera um níu milljörðum króna dýrari en fyrri leiðin. Haldinn verður sérstakur fundur í næsta mánuði þar sem skýrsla samráðshóps um kostnað og kosti í stöðinni verður kynnt sérstaklega. Þá stendur einnig yfir vinna að umhverfismati.

Kristján L. Möller samgönguráðherra segir málið vera í eðlilegum farvegi. Hann hafi átt fund með vegamálastjóra þar sem það hafi komið fram að vinna við umhverfismat sé á fullri ferð og hafi sinn venjulega gang.

Hann segir þó ljóst að málið muni ekki skýrast fyrr en í fyrsta lagi næsta haust. Það fari meðal annars eftir því hvort kærur berist í málinu, en þetta séu flókin skipulagsmál sem þurfi að leysa.