Björgunarsveit kölluð út vegna foks í Hafnarfirði

Lægðin sem gengið hefur yfir borgina hefur valdið þónokkrum vandræðum en ekkert stórfellt tjón hefur hlotist af. Að sögn lögreglu var ástandið verst í Vallahverfi í Hafnarfirði þar sem nokkuð hefur borið á því að verktakar hafi ekki gengið nægilega frá lausum hlutum.

Að sögn lögreglu hefur töluvert af tilkynningum borist vegna foks víðs vegar um borgina. Gluggar og svalahurðir hafa feykst upp auk lausra hluta á svölum og veröndum. Þó þurfti að kalla út björgunarsveit til aðstoðar í Vallahverfinu í Hafnarfirði þar sem byggingaefni, flekamót og fleiri hlutir hafa farið af stað. Vaktstjóri lögreglu segir að á einni lóð hafi sérstaklega illa verið gengið frá og ekki í fyrsta skipti sem kalla þarf út lið til að koma böndum á hlutin þar. Um er að ræða fjölbýlishús í byggingu og segir vaktstjóri að svo virðist vera að þrátt fyrir ítrekaðar tilkynningar þar sem menn eru beðnir um að huga að lausum hlutum á byggingarsvæðum láti sumir ekki segjast.