Vilhjálmur: Ráðist að persónu Ólafs

Vilhjálmur Þ. Vilhjálmsson, oddviti sjálfstæðismanna í Reykjavík, segir að ráðist hafi verið að persónu Ólafs F. Magnússonar í tengslum við myndun nýs meirihluta borgarstjórnar.

Í samtali við Sjónvarpið segir Vilhjálmur að nýr meirihluti sé með skýran málefnasamning og vilji þoka málum áfram. „Það er ekki nóg að mynda meirihluta, það verður að láta verkin tala og það ætlum við að gera," segir Vilhjálmur.

Vilhjálmur var í tvígang spurður að því hver hefði átt frumkvæðið að myndun meirihlutans og sagði hann meðal annars að enginn sérstakur aðdragandi hefði verið að meirihlutasamstarfinu. Ólafur hefði ekki getað unað því lengur að vera í hinu meirihlutasamstarfinu og því hefði hann viljað ganga til samstarfs við sjálfstæðismenn.

Aðspurður um brotthvarf Björns Inga Hrafnssonar, borgarfulltrúa Framsóknarflokksins, af vettvangi stjórnmálanna segir Vilhjálmur að samstarf þeirra hafi verið frábært og Björn Ingi hafi staðið sig vel í sínum störfum.