Samið við Katara um samstarf á fjölmörgum sviðum

Össur Skarphéðinsson iðnaðarráðherra og Yousef Kamal, fjármálaráðherra Katars, skrifuðu í dag undir samning um samstarf Íslands og Katar á sviði efnahags-, viðskipta- og tæknimála.

Samkvæmt tilkynningu frá iðnaðaráðuneytinu er kveðið á um samvinnu í orkumálum, landbúnaði, sjávarútvegi, samgöngum, fjarskiptum, byggingariðnaði, ferðamálum, vinnumarkaðsmálum og fleiri sviðum.

Þá ætla ríkin einnig að hefja samstarf í ferðamálum og skipast á upplýsingum og hefja kynningu á þeim kostum sem fyrir hendi eru í ferðamennsku landanna. Emírinn af Katar, Sheikh Hamad bin Khalifa Al-Thani og Ólafur Ragnar Grímsson, forseti Íslands voru viðstaddir undirritunina í aðsetri emírsins í Doha.

Iðnaðarráðherra átti í gær fund með dr. Mohammed Saleh al-Sadah, orku- og iðnaðarmálaráðherra Katar sem jafnframt er varaforsætisráðherra landsins. Á fundinum voru einnig helstu yfirmenn orkumála- og orkufyrirtækja í landinu auk fulltrúa íslenskra orku- og fjármálafyrirtækja. Þar kom fram mikill áhugi á að þróa samstarf um ýmis verkefni á sviði iðnaðar og nýsköpunar, og lýstu Katarmenn vilja sínum til þess að heimsækja Ísland til þess meðal annars að kynna sér jarðhitaverkefni, djúpborun, kolefnisendurvinnslu og íslenska orkuskóla.

Össur Skarphéðinsson færði varaforsætisráðherra Katars kveðjur Ingibjargar Sólrúnar Gísladóttur utanríkisráðherra og þakkir fyrir stuðning Katars við framboð Íslands til Öryggisráðs Sameinuðu þjóðanna.

Í kvöld taka iðnaðarráðherra og forseti Íslands þátt í umræðufundi um samstarf og hlutverk smáríkja ásamt fjármálaráðherra Katar og fólki úr viðskiptalífi beggja landanna.