Paparassinn vill hjónaband, Britney vill barn

Adnan Ghalib, paparassi og kærasti Britney Spears í var ekki lengi að jafna sig eftir að eiginkona hans skilaði inn skilnaðarpappírunum í gærmorgun.

Sama dag skellti Ghalib sér í viðtal hjá Entertainment Tonight þar sem hann útlistaði í megindráttum samband sitt við poppstjörnuna. Hann sagði það alls ekki rétt að samband þeirra væri í andaslitrunum, og þaðan af síður að Britney hefði beðið um nálgunarbann á sig.

Samkvæmt Ghalib er allt í lukkunnar velstandi hjá skötuhjúunum. Meðal annars sagði hann að þegar myndir náðust af Britney kaupa þungunarpróf hafi það verið vegna þess að hún hefði vonað að hún væri ófrísk eftir hann.

Ghalib kannaðist ekki við það að vera með Britney til þess að selja af henni myndir. Þegar hann var spurður hvort hann langaði að giftast söngkonunni svaraði hann: „Ég væri að ljúga ef ég neitaði því".