Allir eiga að geta skráð sig á heilsugæslustöð

Allir eiga að geta skráð sig á heilsugæslustöðvar og ekki er gert ráð fyrir að hægt sé að loka fyrir skráningar á stöðvarnar.

Þetta kemur fram í bréf sem forstjóri Heilsugæslu höfuðborgarsvæðisins hefur sent yfirlæknum og framkvæmdastjórum heilsugæslustöðva sem tilheyra stofnuninni. Vísað er til bréfsins á vef heilbrigðsráðuneytisins og bent á að þessi réttur byggist á nýjum heilbrigðisþjónustulögunum og reglugerð. Þar segir einnig að ef ekki reynist unnt að skrá einstakling hjá tilteknum heilsugæslulækni á heilsugæslustöð skuli þess þó gætt að hann njóti sambærilegrar þjónustu á stöðinni og aðrir.

Fram kemur á vef heilbrigðisráðuneytsins að heilbrigðisstofnanir eigi að senda landlækni upplýsingar um hvaða einstaklingar eru skráðir á heilsugæslustöðvar sem þær reka, að minnsta kosti einu sinni á ári. Landlæknir geti gefið heilbrigðisstofnunum fyrirmæli um hvernig staðið skuli að miðlun þessara upplýsinga til embættisins.

Heilbrigðisstofnanir í hverju heilbrigðisumdæmi eiga einnig að hafa með sér samráð um skipulag heilsugæslunnar í umdæminu og aðgengi að henni. Komi upp ágreiningur milli heilbrigðisstofnana um skipulag heilsugæslu í heilbrigðisumdæmi sker ráðherra úr.