Tollgæslumenn grunaðir um að hafa rænt veski af konu

Tveir starfsmenn Tollgæslunnar eru grunaðir um að hafa stolið veski ungri konu á skemmtistað í Reykjavík í nótt.

Margrét Huld Einarsdóttir var stödd á skemmtistaðnum Hressó í miðbæ Reykjavíkur síðustu nótt. Á meðan að hún var á dansgólfinu með vinkonu sinni komu tveir karlmenn upp að henni og sögðust vera frá Tollgæslunni að sinna fíkniefnaeftirliti. Báðir sýndu þeir henni skilríki merkt Tollgæslunni. Annar þeirra vildi skoða í tösku Margrétar en áður en að hún vissi af var hann hlaupinn á brott með töskuna. Margrét segir sér hafa verið brugðið en hún hafi sótt vini sína og þau náð öðrum mannanna á hlaupum.

Lögreglan var kölluð á staðinn og handtók manninn sem Margrét og vinir hennar náðu. Honum var sleppt í dag að loknum yfirheyrslum. Lögreglan staðfestir að mennirnir hafi verið með einkennisbúnað merktan Tollgæslunni og að þeir séu báðir starfsmenn Tollgæslunnar.

Lögreglan rannsakar málið en hún segir að ekki hafi verið um neinar aðgerðir á vegum Tollgæslunnar að ræða í nótt en fíkniefnaleit í miðbænum um helgar sé alfarið í höndum lögreglunnar. Mennirnir eru því grunaðir um að hafa stolið veski konunnar en lögreglan vill þó ekki segja hvort að þeir séu grunaðir um að hafa stolið fleiri veskjum eða greiðslukortum.

Snorri Olsen, tollstjóri í Reykjavík, vildi lítið tjá sig um málið þegar eftir því var leitað í dag en sagði að gripið verði til viðeigandi aðgerða ef þess verður þörf þegar rannsókn er komin lengra á veg.