Svona skipun mun alltaf vekja upp efasemdaraddir

Ingibjörg Sólrún Gísladóttir utanríkisráðherra sagði á flokksstjórnarfundi Samfylkingarinnar í dag um skipun Þorsteins Davíðssonar í embætti héraðsdómara, að afgerandi frávik frá niðurstöðu lögmæltrar matsnefndar muni alltaf vekja upp efasemdarraddir um að faglegar forsendur ráði.

Það væri sérstaklega óheppilegt þegar dómstólar landsins ættu í hlut af augljósum ástæðum. Af virðingu fyrir þrískiptingu ríkisvaldsins bæri að forðast slíkt í lengstu lög.

Utanríkisráðherra sagði að umræða hefði einnig skapast um embættisveitingar flokksbróður hennar Össurar Skarphéðinssonar iðnaðarráðherra. Þar væri ekki um það að ræða að gengið væri á svig við niðurstöðu faglegrar dómnefndar og aðstæður því allt annars eðlis. Þegar ráðið væri í stöður hlytu alltaf að koma inn í myndina matskenndir þættir.

Engu að síður skiptir það meginmáli að rökstuðningurinn sé skýr og hinir matskenndu þættir taki mið af því sem um var beðið þegar staðan var auglýst. Hitt er svo annað mál að ef til vill gefa tilvikin tilefni til að styrkja enn frekar faglega ferla stjórnkerfisins.

"Þar hlýtur meðal annars að koma til álita að fjölga sjálfstæðum dómnefndum við mat á umsækjendum um æðstu stjórnunarstöður og kveða enn skýrar á um í lögum hvernig ráðherra skuli fara með niðurstöður slíkrar nefndar," sagði Ingibjörg Sólrún.