Óttast ekki þótt Aron Pálmi lögsæki

Mike Trent, saksóknari í máli Arons Pálma Ágústssonar, segist ekki óttast þótt Aron Pálmi ákveði að stefna honum. Hann segist hafa fulla heimild til að birta gögn í máli Arons Pálma.

Trent skrifaði fyrir nokkrum dögum færslu á heimasíðuna www.icelandweatherreport.com þar sem hann lýsir sinni hlið málsins og fullyrðir að Aron sé sekur um fleiri og mun grófari brot en það sem hann var dæmdur fyrir. Aron Pálmi segir að ásakanir Trents séu rangar og að honum hafi ekki verið heimilt að birta nein gögn úr málinu, þar sem um var að ræða mál barns undir lögaldri.

„Það eru ákveðin gögn, sem snerta unga afbrotamenn, lokuð samkvæmt lögum í Texas og þeim er eytt þegar afbrotamaðurinn nær 21 árs aldri. Þetta er ekki tilfellið í máli Arons Pálma. Öll gögn sem snerta mál Arons Pálma eru opinber gögn og það er ekkert sem hindrar mig í að birta þau opinberlega," segir Mike Trent. Hann segir jafnframt að yfirmaður sinn hafi ekkert á móti því að hann fjalli um málið.

„Aroni Pálma er velkomið að lögsækja mig. Það verður sóun á tíma, peningum og orku. Ég velti því fyrir mér hvernig hann ætlar að sanna ærumeiðingar á mig, þegar hann hefur gert sjálfan sig að viðfangsefni opinberrar umræðu með því að gefa út bók," segir Trent.