Vistunarmatsnefndum fækkað úr 40 í sjö

Guðlaugur Þór Þórðarson heilbrigðisráðherra hefur sett reglugerð um vistunarmat í tengslum við breytingar á lögum um málefni aldraðra sem hefur í för með sér að vistunarmatsnefndum fækkar úr 40 í sjö.

Fram kemur í tilkynningu frá heilbrigðisráðuneytinu að vistunarmat vegna hjúkrunarrýma flytjist frá þjónustuhópum aldraðra á vegum sveitarfélaganna til sérstakra vistunarmatsnefnda sem ráðherra skipar. Starfssvæði nefndanna fellur að heilbrigðisumdæmum landsins sem eru sjö talsins. Hlutverk þeirra verður eingöngu að meta þörf fólks fyrir vistun í hjúkrunarrými, óháð aldri.

Markmiðið með breytingunni er að stuðla að auknu samræmi við gerð vistunarmats og tryggja eins og kostur er faglegar og samanburðarhæfar niðurstöður vistunarmats um allt land, eins og segir í tilkynningu ráðuneytisins.

Samfara þessum breytingum verður eftirlitsnefnd um vistunarmat aldraðra lögð niður og ábyrgð á vistunarmati og framkvæmd þess flyst frá heilbrigðisráðuneyti til landlæknis. Breytingarnar eru meðal annars gerðar með hliðsjón af ábendingum Ríkisendurskoðunar í stjórnsýsluúttekt á þjónustu við aldraða.

Sem fyrr munu stjórnir stofnana taka ákvörðun um hverjir vistaðir eru í hjúkrunarrýmum á viðkomandi stofnun, en ákvörðunarvald þeirra er þrengt frá því sem áður var þegar ríkið greiðir fyrir rýmin. Breytt fyrirkomulag felst m.a. í því að þegar hjúkrunarrými losnar á stofnun skal vistunarmatsnefnd veita viðkomandi stofnun aðgang að upplýsingum um þá þrjá sem óskað hafa eftir vistun þar og metnir eru í mestri þörf umsækjenda fyrir hjúkrunarrými samkvæmt niðurstöðum vistunarmatsnefndar. Ákvörðun um þessa þrjá skal byggð á stigafjölda samkvæmt vistunarmati, eins og segir í tilkynningunni.

Í vistunarmatsnefndunum sjö eru tveir fulltrúar heilbrigðisráðherra og einn fulltrúi tilnefndur af félagsmálráðherra.