Reisugill hæstu byggingar landsins er í dag

Byggingaraðilarnir sem standa að byggingu hæsta húss Íslands á Smáratorgi í Kópavoginum hafa náð þeim áfanga að ljúka uppsteypun og utanhússfrágangi. Hafist var handa við bygginguna síðla árs 2006 og nú rúmu ári síðar er verið að reka smiðshöggið á verkið. Reisugill verður haldið til heiðurs þeim verka- og iðnaðarmönnum sem komið hafa að byggingu turnsins og eru þeir þegar þetta er skrifað að gæða sér á dýrindis humarsúpu.

Á efstu hæð hússins, þeirri tuttugustu, verður glæsilegur veislusalur og bar en á nítjándu hæðinni verður hádegisverðarstaðurinn „Nítjánda".

Í tilkynningu segir að stefnt sé að því að opna tvær efstu hæðirnar þann fimmtánda febrúar næstkomandi. Á meðal annarar starfsemi í húsinu má nefna Deloitte, Fjárstoð, Salt Investment, SMI, World Class, Remax og Kaupþing. Þá eru verslunirnar Pier og Toys R Us á jarðhæð hússins.