Þrjú fræðasvið Háskólans á Akureyri viðurkennd

Þorgerður Katrín Gunnarsdóttir menntamálaráðherra afhenti Háskólanum á Akureyri viðurkenningu vegna fræðasviða við athöfn í Þjóðmenningarhúsi í gær. Viðurkenningarnar eru byggðar á áliti alþjóðlegra sérfræðinefnda sem fóru yfir starfsemi háskólans og skiluðu ítarlegum skýrslum um hana. Niðurstöður sérfræðinefndanna eru jákvæðar og mæltu þær einróma með að háskólinn öðlaðist viðurkenningu á fræðasviðum auðlindavísinda, félagsvísinda og heilbrigðisvísinda.

Vandlega ber að huga að alþjóðlegri starfsemi

Nefndin um auðlindavísindi telur að kennsla og rannsóknir í auðlindavísindum snúist um málefni sem miklu skipta fyrir nánasta umhverfi og landsfjórðung háskólans, enda þótt samstarf á landsvísu sem og á alþjóðavettvangi sé einnig veigamikill þáttur. Bent er á að vandlega skuli huga að þætti hinnar alþjóðlegu starfsemi í áætlunum háskólans og nýta ætti sem allra best þau færi sem gefast til samstarfs á alþjóðlegum vettvangi til að styrkja fræðilega þekkingu innan háskólans og vekja athygli á honum erlendis.

Nefndin um félagsvísindi fullyrðir að kennslu og rannsóknum í félagsvísindum hafi fleygt fram í Háskólanum á Akureyri á tiltölulega skömmum tíma og að stjórnendur, starfsfólk og nemendur skólans vinni af krafti við að efla háskólann enn frekar. Jafnframt kemur fram að háskólinn eigi skilið viðurkenningu fyrir þá aðstöðu til fjarkennslu sem byggð hefur verið upp sérstaklega sú stefna að vinna náið með símenntunarmiðstöðvum um land allt.

Gott samstarf nemenda og kennara

Nefndin um heilbrigðisvísindi gefur þeim vísindum jákvæða umsögn. Starf kennara og framlag nemenda fær einnig góða dóma. Samstarfi nemenda og starfsmanna er hælt og vakin athygli á þeirri staðreynd að smæð háskólans auðveldi jákvæð og gjöful tengsl á milli þessara aðila.