Síldinni mokað upp við Stykkishólm

Þrjú síldveiðiskip fylltu sig nánast uppi í landsteinum við Stykkishólm í dag og mokuðu þar upp samtals hátt í tvöhundruð milljóna króna gjaldeyrisverðmæti. Nærri þrefalt hærra verð fæst fyrir síldina nú en í fyrra.

Kristján Már Unnarsson, fréttamaður Stöðvar 2, var í síldarævintýri á Breiðafirði, og heilsaði upp á sjómenn um borð í Bjarna Ólafssyni AK.

Það er tilkomumikið að sjá þessi stóru veiðiskip athafna sig aðeins örfáa tugi metra frá ströndinni. Hér kastar Börkur nótinni en þarna er svo grunnt að hún nær niður á botn. Skipið siglir svo umhverfis síldartorfuna og girðir hana þannig af með nótinni. Henni er síðan lokað í botninn og hún dregin saman upp að skipinu. 450 tonn fengust þar, þrjátíu til fjörutíu milljóna gjaldeyrisverðmæti í einu kasti. Skipstjórarnir mega hafa sig alla við innan um óteljandi eyjar og sker og reyndar neyddist skipstjórinn á Ásgrími Halldórssyni til að hætta við eitt kastið í dag þegar hann næstum lenti upp á boða. Hér eru skipverjarnir á Bjarna Ólafssyni búnir að ná 300 tonna kasti, dælan er sett út og hafist handa við að ná síldinni um borð.

Í fyrra fengust ellefu krónur fyrir kílóið en nú fæst nærri þrefalt meira fyrir síldina, hátt í þrjátíu krónur. Sjómennirnir segja síldina betri nú en þá síld sem fékkst í Breiðafirði í fyrra. Tekjurnar nú bæti fyrir dapra loðnuvertíð.

Sjómennirnir höfðu á orði að þeir gætu nánast horft inn um eldhúsgluggana í Hólminum um leið og þeir nytu náttúrufegurðar við Breiðafjörð. Og kokkurinn naut lífsins í veðurblíðunni enda stilltur sjór.

En þetta snýst þó um allt annað, að afla tekna fyrir þjóðarbúið. Skipin þrjú fylltu sig öll í dag, af síld sem þau sigla með ýmist í Horrnafjörð eða Neskaupstað þar sem hún verður flökuð eða fryst og síðan seld til útlanda, einkum til Rússlands, sem virðist borga best þessa dagana. Okkur reiknast til að afli þessara þriggja skipa rétt utan við Stykkishólm á þessum eina degi skili þjóðarbúinu um tvöhundruð milljóna króna gjaldeyristekjum.