Fólk yfirgefur sumarbústaði í Skaftárdal

Skaftá líkist nú Ólgusjó og óx í ánni um meter á aðeins tveimur tímum í morgun að sögn lögreglunnar á Kirkjubæjarklaustri. Hlaup í Skaftá tekur yfirleitt um hálfan sólarhring að ná hámarki. Rennsli árinnar við Sveinstind mældist um 300 rúmmetrar á sekúndu í morgun, þar sem meðalrennsli er í kringum fimmtíu rúmmetrar.

Fólki er ráðlagt að vera ekki nálægt upptökum árinnar vegna brennisteinsmengunar. Björgunarsveitarmenn eru við Langasjó til að tryggja öryggi fólks og fylgjast með vatnavöxtum. Fólk sem dvaldi í þremur sumarbústöðum í Skaftárdal hefur yfirgefið þá, og nú er tekið að flæða yfir veginn sem að þeim liggur. Þá segir landvörður í Hólaskjóli vatnsmagn hafa aukist töluvert í ánni og megnan brennisteinsþef liggja yfir.

Upprunastaður Skaftárhlaupa er undir Vatnajökli norðvestur af Grímsvötnum. Þar eru tvö jarðhitasvæði sem bræða jökulinn án afláts, en vatnið sleppur ekki burt vegna þess að þar er lægð í yfirborð jökulsins. Þessar lægðir eru kallaðar Skaftárkatlar. Að jafnaði hafa liðið rúm tvö ár milli hlaupa úr hvorum katli. Stórt hlaup kom úr Eystri-Skaftárkatli í april í fyrra og annað smærra í september. Nú er talið líklegt að hlaup sé úr vestari katlinum.