„Þetta horfði þunglega í alla nótt“

„Þetta horfði þunglega í alla nótt alveg fram undir morgun," sagði Loftur Jóhannsson, formaður Félags íslenskra flugumferðarstjóra, sem í morgun náði samkomulagi í kjaradeilu sinni við samninganefnd Samtaka atvinnulífsins. Samtökin semja fyrir hönd Flugstoða ohf.

Í kjölfarið var vinnustöðvun flugumferðarstjóra, sem hófst klukkan sjö í morgun, aflýst og sömuleiðis hinum 19 sem boðaðar höfðu verið næsta mánuðinn.

Samið var um 4,75 prósenta hækkun á töxtum við undirritun samninga og þriggja prósenta hækkun aftur í febrúar á næsta ári. Þá var samið um sérstakt kennsluálag fyrir þá sem eru með nýja flugumferðarstjóra í þjálfun. Ekkert var hins vegar fjallað um yfirvinnu í samningnum að sögn Lofts. Samningurinn gildir til loka október á næsta ári.

„Það er langt frá því að við höfum náð okkar markmiðum en við sættum okkur við þennan samning í bili," sagði Loftur við fréttamenn eftir að samningar höfðu náðst hjá ríkissáttasemjara eftir nærri sólarhringsfund.

Flugstoðir fagna nýgerðum samningi sem og starfsemi Flugstoða fer nú í eðlilegt horf. Á heimasíðu Flugstoða segir að íslenskir og erlendir ferðamenn geti nú ferðast um og yfir Íslandi án þess að hafa áhyggjur af því að komast ekki leiðar sinnar.