Bankar hunsa tilmæli ráðherra

Bankar og lánastofnanir virðast hunsa tilmæli ríkisstjórnarinnar um frystingu íbúðalána. Dæmi eru um að bankar krefjist vaxtahækkunar gegn því að frysta lán.

Hrun krónunnar hefur haft skelfilegar afleiðingar fyrir heimilin í landinu. Lán í erlendri mynt hafa rokið upp og þá munu verðtryggð lán einnig hækka samfara vaxandi verðbólgu. Ríkisstjórnin beindi þeim tilmælum til lánastofnana að hjálpa fólki í greiðsluerfiðleikum meðal annars með því að frysta lán þangað til ró kemst á gjaldeyrismarkaðinn.

Bankar virðast þó í mörgum tilvikum hunsa þessi tilmæli.

Kristinn Halldór Einarsson lántakandi er ósáttur. „Við hjónin erum með myntkörfu lán á íbúðinni okkar og óskuðum eftir frystingu og vísuðum þá til yfirlýsingar frá ríkisstjórninni. Þar könnuðust menn ekki við eitt eða neitt. En þeir voru tilbúnir til þess að bjóða okkur frystingu gegn því að við myndum samþykkja hækkun á vaxtaálagi úr 2,1 upp í 3,1 prósent."

Vaxtaálágið hækkaði því um nærri helming. „Mér finnst þetta vera siðlaust," segir Kristinn. „Það sem bankinn ætlar að gera núna. við erum að lenda í greiðsluerfiðleikum vegna mikillar - mikillar lækkunar á gengi krónunnar og afborganir hafa hækkað mjög mikið. Og þá ætlar bankinn okkar að nýta sér lagið og láta okkur borga sex milljónir extra þóknun yfir lánstímann."

Ægir Geirdal sótti um frystingu hjá sínum sparisjóð en fékk neitun hjá þjónustufulltrúa sínum. „Hún sagði að samkvæmt reiknilíkaninu þá kæmi ég ekki til með að geta borgað lánið," sagði hann í samtali við Stöð 2.