Stöðugildum fækkað um 20 hjá RÚV

Ríkisútvarpið hefur ákveðið að fækka stöðugildum um 20 til þess að spara í rekstri félagsins. Þetta staðfesti Páll Magnússon útvarpsstjóri í samtali við Vísi.

,,Miðað við að stjórnvöld standi við upphaflegar fyrirætlanir varðandi afnotagjöld þarf ekki að grípa til frekari uppsagna. Við getum ekki fullyrt um það hvort að til þess þurfi að koma," segir Páll.

Beinar uppsagnir eru átta talsins. ,,Ekki verður endurráðið í aðrar átta stöður og þá verður ekki ráðið afleysingarfólk í fjórar stöður þar sem fólk er að fara í langtímaleyfi eins og barneignarleyfi," segir Páll.

,,Grundvallartekjuforsendan var sú að afnotagjöldin héldust óbreytt. Það hefur ekki gerst," segir Páll. Rúmlega 400 milljónir vantar uppá svo að tekjuforsendur fáist staðist. ,,Það má líta þannig á það að kaupandinn á þjónustunni hafi ákveðið að kaupa minna en hann ætlaði sér. Hann hefur svo sem vald til þess. Við þessari stöðu erum við að bregðast," segir Páll.

Páll kynnti aðhaldsaðgerðirnar fyrir stjórn fyrirtækisins fyrir helgi og var tillagan samþykkt. Páll segir að menntamálaráðuneytinu hafi verið kunnugt um að aðgerðir væru í uppsiglingu.