Orka landsins nýtt af skynsemi og náttúruperlum hlíft

Ríkisstjórnin mun byggja upp íslenskt atvinnulíf með því að nýta orku landsins af skynsemi og gæta þess að ekki verði farið inn á þær náttúruperlur sem þjóðin telur að ekki mega raska.

Þetta sagði Össur Skarphéðinsson iðnaðarráðherra sem skiptist á föstum skotum við Steingrím J. Sigfússon, formann Vinstri - grænna, í utandagskrárumræðu um stefnu ríkisstjórnarinnar í virkjana- og stóriðjumálum á Alþingi í dag.

Spurði Steingrímur hvort það væri stefna ríkisstjórnarinnar að dæla tveimur til tveimur og hálfu álveri og olíuhreinsistöð inn í hagkerfið og benti á að ef það væri raunin þyrfti að virkja mikið.

Spurði hann enn fremur hvernig slík stefna rímaði við yfirlýsingar Samfylkingarinnar um að pláss væri fyrir eitt lítið álver eða stækkun álversins í Straumsvík innan loftlagsskuldbindinga Íslands. Spurði hann enn fremur hvað Samfylkingin segði um að frekari álvæðing hér á landi yki einhæfni íslensks atvinnulífs og hvort menn væru tilbúnir til að gera Ísland jafnháð heimsmarkaði á áli og þjóðin var háð sjávarútvegi á fyrri áratugum.

Þjóðin vill ekki fleiri álver

Steingrímur spurði jafnframt iðnaðarráðherra hvort virkja ætti í neðri hluta Þjórsár og hvor ráðherra myndi beita sér fyrir eignarnámi á löndum þar svo áformin næðu fram að ganga og hvort fórna ætti Skjálfandafljóti og Jökulánum í Skagafirði. Enn fremur benti hann á að þrátt fyrir krepputal vildi þjóðin ekki fleiri álver en menn væru hins vegar ekki andvígir hóflegri orkunýtingu.

Spurði hann hvort það væri stefna ríkisstjórnarinnar að öll stóriðjuáform frá fyrri ríkisstjórn væru í gangi og með hvaða veganesti ráðherrar Samfylkingarinnar ætluðu til Kaupmannahafnar til þess að ræða um heimildir til losun gróðurhúsalofttegunda. Enn fremur hvort ríkisstjórnin væri staðráðin að ástunda hrossalækningar í hagkerfinu og keyra inn í hagkerfið tvö til þrjú risavaxin stóriðjuverkefni.

Össur Skarphéðinsson iðnaðarráðherra sagði erfitt að fylgja hinum rökræna þræði í ræðu Steingríms og að formaður Vinstri - grænna hefði ausið úr skálum reiði sinnar um hugaróra sína um þau verk sem væru á borðinu. Benti Össur á ekki stæði til að virkja Jökulsá á Fjöllum og þá sagðist hann hafa lýst því áður að honum litist ekki vel á olíuhreinsistöð á Vestfjörðum. Varðandi gagnrýni Steingríms á að orku skorti fyrir lítil og meðalstór fyrirtæki sagði Össur að á næstu árum yrði hægt að afla orku fyrir þau.

Getur ekki tjáð sig um virkjanir í Þjórsá

Þá sagðist hann ekki getað tjáð sig um áform um virkjanir í neðri hluta Þjórsár þar sem hann sem ráðherra þyrfti að skera úr um virkjanaleyfi og hugsanlega úrskurða um eignarnám. Þá rifjaði hann upp að Steingrímur hefði á Alþingi fyrir nokkrum misserum sagt að Þjórsárvirkjanir væru ákjósanlegri en margir aðrir virkjanakostir. Þá blasti það við að enginn þingmaður í þingsal hefði stutt stóriðju á landinu jafnmikið í gegnum tíðina og Steingrímur J. Sigfússon. Hann hefði verið í flokkum sem hefðu stutt álver og stóriðju og flutt mikinn lofsöng um gæði áls sem umhverfisvæns málms. Þetta yrðu menn að hafa í huga þegar hlustað væri á þann endemis málflutning sem Steingrímur bæri fram, sagði ráðherra.

Ríkisstjórnin fylgjandi Bakkaálveri

Þá sagði Össur að ríkisstjórnarflokkarnir hefðu náð saman um að ekki yrði farið inn á verðmæt náttúrusvæði til virkjunar og þrátt fyrir allan hávaðann hefði Steingrímur ekki getað bent á eitt tilvik þar sem það hefði verið gert. Ríkisstjórin myndi byggja upp íslenskt atvinnulíf með því að nota orku landsins af skynsemi og gæta þess að ekki yrði farið inn á þær náttúruperlur sem þjóðin teldi að ekki mætti raska. Minnti hann á rammaáætlun um nýtingu vatnsafls sem unnin hefði verið og rammaáætlun um nýtingu jarðhita væri í vinnslu.

Þá sagði Össur að ríkisstjórnin styddi álver á Bakka en hvorki núverandi né fyrrverandi ríkisstjórn hefði komið að ákvörðun um álver í Helguvík. Benti Össur enn fremur á að Steingrímur hefði sagt skömmu eftir síðustu kosningar að það væri tæknilega ókleift að stöðva Helguvíkurálver og að það yrði ekki afarkostur af hálfu Vinstri - grænna í stjórnarmyndunarviðræðum. Vinstri - græn hefðu verið tilbúin að kaupa sig inn í ríkisstjórn með því að hverfa frá prinsippum sínum.