Hefur ekki tekið ákvörðun um málsókn gegn Daily Mail

Ólafur F. Magnússon, fyrrverandi borgarstjóri, hefur ekki tekið ákvörðun hvort hann höfði mál gegn breska dagblaðinu Daily Mail vegna umfjöllunar um hann í október. ,,Mér er annt um mannorð mitt eins og fleirum," sagði Ólafur í samtali við Vísi. ,,Ég er enn að skoða málið."

Daily Mail birti 12. október umfjöllun um veru Ólafs á 101 Hóteli föstudagskvöldið 10. október og meint tengsl hans við Jón Ásgeir Jóhannesson, stjórnarformann Baugs.

Blaðið gaf í skyn að borgarstjórinn fyrrverandi hafi bæði sýnt óviðeigandi framkomu og spillingu í borgarstjóratíð sinni. Ólafur var sagður drekka ótæpilega og þá var fullyrt að hann hafi fengið taugaáfall skömmu fyrir seinustu borgarstjórnarkosningar.

Ólafur sagði í samtali við Vísi 22. október að umfjöllun blaðsins hafi bæði verið meiðandi og röng. Hann sagðist ekki hafa nein persónuleg tengsl við forsvarsmenn Baugs og aðra útrásarvíkinga. Hann hafi einungis setið á næsta borði á 101 Hóteli umrætt kvöld.

Frétt Daily Mail má sjá hér.