Yfirmaður greiningadeildarinnar ekur á BMW

Síðasti þáttur sakamálaseríunnar Svartir Englar verður sýndur í kvöld. Í síðasta þætti gerðust hlutirnir ansi hratt, en þá fannst lík konu, sem hafði verið saknað, í vatnsþró í Hvalfjarðargöngunum. Konan sem hét Birgitta hafði verið að vinna að sérstökum njósnahugbúnaði fyrir greiningardeild lögreglunnar. Hugbúnaðurinn geymir allar persónuupplýsingar sem til eru um íslensku þjóðina.

Yfirmaður greiningardeildarinnar heitir Leifur og er leikin af Magnúsi Ragnarssyni. Leifur er í uppáhaldi hjá dómsmálaráðherra og leyfist því margt sem öðrum lögreglumönnum leyfist ekki. Vísbendingar voru um það í síðasta þætti, að Leifur stæði á bakvið morðið á Birgittu og að dómsmálaráðherrann hafi sjálfur gefið skipun um það. Hvort svo reynist vera, kemur væntanlega í ljós í kvöld.

Bílar koma mikið við sögu

Glöggir sjónvarpsáhrofendur hafa tekið eftir því að bílar sögupersónanna koma mikið við sögu í þáttunum. Þannig ekur lögregluforinginn Leifur um á nýjustu gerð af BMW M3 sportbíl, en almennu rannsóknarlögreglumennirnir aka um á Hyundai og Renault bílum. Alls voru um þrjátíu ólíkir bílar notaðir í þáttunum og því þurftu framleiðendur þáttana að leita til eins af bílaumboðunum um lán á bílum fyrir persónurnar.

Að sögn Haraldar Haraldssonar, markaðstjóra B&L, er algjörlega óvíst hvort að það gagnist fyrirtækinu nokkuð að hlaupa svona undir bagga með kvikmynagerðarmönnum. „Ég veit ekki hvort við seljum nokkuð fleiri bíla út á þetta, en óneitanlega er skemmtilegt fyrir starfsfólkið okkar og viðskiptavini, að sjá bíla frá okkur leika stórt hlutverk í svona vinsælu sjónvarpsefni," segir Haraldur.

Aðspurður um sportbíl Leifs lögregluforingja, segir Haraldur að slíkir bílar séu bara seldir eftir pöntun og kosti vel á annan tug milljóna. „Ég á ekki von á að selja marga svona á næstunni. En þessi sem sést í þáttunum, er sem betur fer seldur."