Ómetanlegum verðmætum verði ekki fórnað fyrir stundargróða

Íslandshreyfingin varar við því að ómetanlegum náttúruverðmætum verði fórnað fyrir stundargróða við núverandi aðstæður í efnahagsmálum.

Segir hreyfingin að þörf sé á nýju gildismati og uppstokkun á grundvelli ítarlegrar greiningar á því hvað fór úrskeiðis, helst með aðstoð erlendis frá, svo læra megi af mistökunum. „Þá getur runnið upp ný öld í endurreisnar þar sem ómetanlegum náttúruverðmætum er ekki fórnað fyrir stundargróða og ekki sótt svo skefjalaust í orkulindirnar að þær þverri og séu ekki endurnýjanlegar," segir Íslandshreyfingin.

Fara þurfi leið Finna sem hafi aukið landsframleiðslu sína með framleiðslu byggðri á hugviti og menntun. Annars flýi unga fólkið land. „Ná þarf samstöðu og æðruleysi til að komast út úr vandanum og framsýni til að koma í veg fyrir að honum verði velt yfir á komandi kynslóðir. Það er skylda okkar að sýna hugrekki og þrautseigju, axla ábyrgð á því hvernig komið er og líta í eigin barm," segir einnig í ályktunninni.