Varað við slæmu veðri víða um land

Almannavarnardeild ríkislögreglustjóra býst áfram við slæmu veðri næsta sólarhringinn víða um land og er Veðurstofan enn með viðvörun vegna norðan og norðvestan 20 til 25 metrar á sekúndu yfir Vestfjörðum fram á nótt, suðvestanlands undir kvöld og norðanlands á morgun.

,,Ljóst er að áhrifa veðursins í kvöld og nótt mun helst gæta á Vestfjörðum, Snæfellsnesi, Reykjanesi og á Höfuðborgarsvæðinu. Viðbragðsaðilar á þessum stöðum eru með nokkurn viðbúnað vegna þess," segir í tilkynningu frá Almannavarnardeild ríkislögreglustjóra.

Slysavarnafélagið Landsbjörg verður með björgunarsveitir í viðbragðsstöðu og munu björgunarsveitir á höfuðborgarsvæðinu vera með mannskap á vakt í nótt.

Þá er Landhelgisgæslan með varðskipið Týr í viðbragðsstöðu á Faxaflóa ef á þarf að halda ásamt því að danskt varðskip er í höfn í Reykjavík og tilbúið til aðstoðar.

Almannavarnadeild ríkislögreglustjóra hvetur almenning til að fylgjast áfram vel með veðurspá og vera ekki á ferðinni á nauðsynjalausu þar sem áhrifa veðursins gætir.