Jón Baldvin man eftir reikningnum

Jón Baldvin Hannibalsson var sendiherra í Washington þegar Guðrún Katrín Þorbergsdóttir leitaði sér lækninga í Seattle í Bandaríkjunum. Hann segist muna eftir því að sendiráðinu hafi borist reikningur vegna læknismeðferðar Guðrúnar Katrínar Þorbergsdóttur forsetafrúar. Matthías Johannessen, fyrrverandi ritstjóri Morgunblaðsins, vitnar í dagbókarfærslu sinni frá árinu 1998 í samtal sem hann átti við Davíð Oddson, þáverandi forsætisráðherra. Davíð segir Matthíasi frá því að sendiráðinu í Washington hafi borist reikningur að upphæð fimmtán milljónir króna vegna læknismeðferðar Guðrúna Katrínar.

„Þetta rifjast upp þegar þú nefnir það," segir Jón Baldvin en segist ekki muna upphæðina á reikningnum. Hann segir líklegt að málið hafi farið um sínar hendur í Washington og að hann hafi komið því í hendur stjórnvalda hér á landi. „Það er mjög algengt að Íslendingar sem þurfa að fara undir læknishendur í útlöndum leiti til sendiráðs í viðkomandi landi. Við búum svo vel hér á landi að hafa almannatryggingakerfi en því er öðruvísi farið í sumum löndum, til dæmis í Bandaríkjunum. Fólk leitar því til sendiráðsins til þess að fá upplýsingar og jafnvel fyrirgreiðslu," segir Jón Baldvin.

Hann bendir á að Guðrún hafi verið alvarlega veik og að hún hafi gengist undir dýra læknismeðferð í Seattle. „Ég er hins vegar ekki til frásagnar um það hvernig þau hjón gengu frá samningum við sjúkrastofnanir sem þau leituðu til," segir Jón Baldvin Hannibalson að lokum.