Álit mannréttindanefndar SÞ ber að taka alvarlega

Ingibjörg Sólrún Gísladóttir, formaður Samfylkingarinnar, segir að taka beri álit mannréttindanefndar Sameinuðu þjóðanna vegna fiskveiðistjórnunarkerfisins alvarlega. Í stjórnarsáttmálanum sé kveðið á um að kvótakerfið verði endurmetið og sú vinna þurfi að fara sem fyrst á stað.

„Ég hef sagt það alveg skýrt að égt telji að við eigum að taka þetta álit alvarlega og það er líka gert ráð fyrir því inni í stjórnarsáttmálanum að það fari fram ákveðið endurmat á kvótakerfinu og áhrif þess meðal annars á byggðir landsins. Og sú vinna þarf bara að fara fram," segir Ingibjörg Sólrún.

Hún segir enn fremur að það þurfi að fara sem fyrst af stað vinna í þessu sambandi og hún geri ráð fyrir að vinna sé hafin að því í sjávarútvegsráðuneytinu.

Aðspurð hvort von sér á róttækum breytingum segir utanríkisráðherra að hún geti ekkert um það sagt á þessu stigi. „Við ætlum að fara í þessa skoðun, með tilliti til þess meðal annars hvernig kvótaframsalið kemur fram, en við verðum bara að sjá hver niðurstaðan verður að því loknu," segir Ingibjörg Sólrún.