Íslendingar með formennsku í norrænu ráðherranefndinni á næsta ári

Íslendingar gegna formennsku í norrænu ráðherranefndinni á næsta ári og mun Geir H. Haarde kynna formennskuáætlunina á Norðurlandaráðsþingi í Helsinki í dag.

Yfirskrift formennskuáætlunarinnar er Norrænn áttaviti og er gerð grein fyrir helstu stefnumálum í fjórum undirköflum. Rauður þráður í áætluninni er að stórefla samstarf um rannsóknir og nýsköpun, ekki síst á sviði loftslags-, orku- og umhverfismála. Þannig vilja Íslendingar samstarf við gerð vákorts fyrir Norður-Atlantshafið sem verður grundvöllur fyrir samræmdar aðgerðir komi til umhverfisslyss, þverfaglegt samstarf sem miðar að því að efla frumkvöðlamenningu á öllum stigum skólakerfisins og átak til að auka áhuga á norrænum menningar- og málskilningi.

„Efnt verður til fjölmargra ráðstefna og málþinga á Íslandi á formennskuárinu 2009, m.a. um nýsköpunarmennt, gæði í norrænu háskólastarfi og nýsköpun í sjávarútvegi. Stærsti viðburðurinn verður hnattvæðingarþing í lok febrúar, þar sem orku- og umhverfismál verða til umræðu. Sérþekking og nýsköpun norrænna þjóða í umhverfistækni og endnýjanlegum orkugjöfum verður þar í forgrunni. Á þinginu verða saman komnir forsætisráðherrar Norðurlanda, samstarfsráðherrar, forystumenn í norrænu atvinnulífi og fremstu sérfræðingar um hnattvæðingu og nýsköpun," segir í tilkynningu norrænu ráðherranefndarinnar.