Óskar Bergsson: Þurfum að vinna tiltrú borgarbúa

Óskar Bergsson, oddviti Framsóknarmanna í Reykjavík, segir niðurstöðu skoðannakönnunar Stöðvar 2, að 63% séu andvíg nýjum meirihluta Sjálfstæðisflokks og Framsóknarflokks, sýni að mikið verk sé fyrir höndum við að vinna tiltrú borgarbúa á nýjan leik.

„Það er alveg ljóst að við höfum mikið verk fyrir höndum við að vinna tiltrú borgarbúa aftur. Það verður okkar helsta verkefni á næstunni," segir Óskar.

„Mér finnst þessi niðurstaða endurspegla vel þá óánægju sem hefur ríkt meðal borgarbúa með stjórnun borgarinnar undanfarið ár og úr því þarf að bæta. En svona traust verður ekki unnið á einum degi," segir Óskar og bætir við að hann hafi fundið fyrir miklum stuðningi á meðal framsóknarmanna og einnig starfsmanna Reykjavíkurborgar eftir meirihlutaskiptin.