Nær 63% Reykvíkinga andvíg nýja meirihlutanum

Tveir af hverjum þremur Reykvíkingum eru andvígir meirihlutasamstarfi Framsóknarflokks og Sjálfstæðisflokks samkvæmt nýrri könnun Capacent fyrir Stöð 2. Fjórðungi kjósenda Framsóknarflokksins í borginni hugnaðist ekki að þessir tveir flokkar tækju saman við völdum í Reykjavík.

Könnunin var gerð á sjö daga tímabili og hófst daginn sem nýr meirihluti Sjálfstæðismanna og Framsóknarflokksins var kynntur þann 14. ágúst. Spurt var: Ert þú fylgjandi eða andvígur meirihlutasamstarfi Sjálfstæðisflokks og Framsóknarflokks í borgarstjórn?

Rúm níu prósent eru mjög fylgjandi og rösk fjórtán prósent frekar fylgjandi. Samtals er því tæpur fjórðungur aðspurðra hlynntir nýja meirihlutanum. 14,6 prósent er hvorki fylgjandi né andvíg. Tæp fimmtán prósent eru frekar andvíg en 47 prósent eru mjög andvíg. Nær 63% Reykvíkinga eru þannig andvíg nýja meirihlutanum.

Afstaða manna til nýja meirihlutans ræðst að stórum hluta af því hvaða flokk þeir styðja. Þegar svörin voru greind eftir því hvaða flokk viðkomandi myndi kjósa eða væri líklegastur til að kjósa ef kosið yrði í dag til borgarstjórnar kom í ljós verulegur munur á afstöðu manna til nýja meirihlutans.

Tæp sjötíu prósent kjósenda Sjálfstæðisflokksins eru fylgjandi - en níu prósent andvíg. Hver einasti kjósandi Frjálslynda flokksins er andvígur meirihlutasamstarfinu. Tæp 98% kjósenda Vinstri grænna er sömuleiðis andvígur og nærri níu af hverjum tíu kjósenda Samfylkingarinnar. Ríflega 62 prósent þeirra sem myndu kjósa Framsóknarflokkinn eru fylgjandi meirihlutasamstarfinu en athygli vekur að 25% þeirra eru því andvígir.

Capacent kannaði afstöðu tæplega 730 Reykvíkinga á aldinrum 18-75 ára dagana 14. til 21. ágúst. Svarhlutfall var 55,1%