Engin lán starfsmanna afskrifuð hjá Nýja Glitni

Nýi Glitnir hefur yfirtekið öll lán til starfsmanna og stjórnenda bankans sem þeir tóku hjá gamla Glitni til að fjármagna kaup á hlutabréfum í gamla Glitni. Lánin verða innheimt í samræmi við almennar reglur bankans.

Þetta segir í tilkynningu frá stjórn Nýja Glitnis sem barst Vísi nú í kvöld. Þar segir ennfremur:

„Lánin voru færð til Nýja Glitnis með ákvörðun stjórnar Fjármálaeftirlitsins sem fól í sér yfirtöku Nýja Glitnis á innlendri bankastarfsemi gamla Glitnis. Af hálfu Nýja Glitnis hafa engin lán vegna hlutabréfakaupa starfsmanna eða félaga í þeirra eigu verið felld niður eða afskrifuð né ábyrgð á slíkum skuldbindingum með öðrum hætti verið takmörkuð.

Eðli málsins samkvæmt getur stjórn Nýja Glitnis ekki fjallað um viðskipti einstakra starfsmanna enda bundin þagnarskyldu um allt er varðar viðskipta- eða einkamálefni viðskiptamanna."