Erfitt að ráða fólk í Vesturbæinn

Erfiðlega hefur gengið í haust að ráða starfsfólk á frístundaheimili Reyjavíkurborgar í Vesturbænum. Undanfarin ár hefur gengið einna best að manna frístundaheimili í þeim borgarhluta en aftur á móti hefur reynst erfiðara að ráða starfsfólk í úthverfin. Svo virðist sem að staðan sé að snúast við.

,,Við höfum ekki lent áður í vandræðum með mönnun í Vesturbænum. Yfirleitt höfum við verið fljótust að ganga frá ráðningum þar þannig að þetta kemur mjög á óvart," segir Soffía Pálsdóttir, skrifstofustjóri hjá ÍTR. Í ár hefur gengið betur að ráða starfsfólk á frístundaheimili í Breiðholti, Árbæ, Grafarvogi og öðrum úthverfum borgarinnar sé miðað við byrjun september fyrir ári.

Undanfarin ár hafa frístundaheimili borgarinnar verið mönnuð fólki í hlutastörfum samhliða skólahaldi yfir vetrarmánuðina og fram á vorin. Oftar en ekki hefur verið um háskóla- og framhaldsskóla að ræða.

Í sumar bauðst börnum í fyrsta sinn það sem Soffía kallar heilsársfrístund. ,,Þetta er tilraunaverkefni hjá ÍTR þar sem börnin eru hjá okkur allt árið í kring í öruggri umsjá sömu starfsmanna," segir Soffía. Fyrir vikið hefur hefur verið hægt að ráða fólk í heilsársstörf og starfsmannaveltan virðist vera minni.

Aftur á móti hefur skólafólk verið uppistaðan í starfsliði frístundaheimila í Vesturbænum sem skýrir að einhverju leyti af hverju erfiðlega hefur gengið að manna heimilin, að mati Soffíu.

Soffía vonast til þess að hægt verði að ná meiri samfellu í starfsmannahald frístundaheimila borgarinnar verði ákveðið að bjóða upp á heilsársfrístund.