Kemur ekki til greina að Kristinn verði áfram þingflokksformaður

Miðstjórn Frjálslynda flokksins hefur skorað á þingflokkinn að gera Jón Magnússon, þingmann, að formanni þingflokksins í stað Kristins H. Gunnarssonar. Kristinn H. vildi ekki tjá sig um málið þegar Vísir hafði samband við hann en Jón Magnússon segir að Kristni sé ekki sætt á stóli þingflokksformanns.

Kristinn segist ekki hafa mætt á miðstjórnarfundinn og vildi hann lítið tjá sig um málið þegar Vísir hafði samband við hann. Hann benti þó á að það væri þingflokkurinn sem tæki ákvörðun um hver væri þingflokksformaður hverju sinni og að sú ákvörðun væri miðstjórn flokksins óviðkomandi.

Vísir hefur ekki náð í formann flokksins, Guðjón Arnar Kristjánnson vegna málsins, en hann mun staddur í Rússlandi ásamt fleiri þingmönnum. Grétar Mar Jónsson, þingmaður flokksins segir að Guðjón Arnar hafi lýst því yfir fyrir nokkru síðan að Jón ætti að taka við af Kristni um mitt kjörtímabil eða næsta vor. „Ég er sammála Guðjóni í því, að gera þetta næsta vor," sagði Grétar Mar.

Jón Magnússon segist hafa vikið af fundinum áður en áskorunin var borin upp. Hann vildi lítið tjá sig um áskorun miðstjórnarfundarins, sagði að það færi betra að ræða það við formann flokksins.

Hann er hinsvegar ómyrkur í máli þegar hann er inntur álits á því hvernig Kristinn hafi staðið sig í starfi þingflokksformanns: „Ég tel eiginlega ekki koma til greina að hann haldi áfram sem þingflokksformaður," segir Jón, sem segist byggja þá skoðun sína á því hvernig Kristinn hafi „farið fram í sínum störfum." Aðspurður hvort Kristni væri yfirhöfuð sætt í Frjálslynda flokknum segir Jón að það sé allt annað mál. „Þetta er spurning um hvort þú viljir lúta forystu ákveðins aðila og teljir hann eðlilegasta foringjann. Ég hef gert Guðjóni Arnari ljóst að miðað við fengna reynslu af Kristni gangi ekki að hafa hann sem þingflokksformann."

„En það hefur ekkert með það að gera hvort ég taki við eða einhver annar," segir Jón. Hann segist ekki kannast við það að Guðjón hafi ákveðið að skipt verði um formann næsta vor, eins og Grétar Mar segir. „Hann hefur ekki rætt það við mig," sagði Jón. „Guðjón er ekki einræðisherra í þessum flokki. Það er lýðræði í þessu landi og í stjórnmálaflokkum landsins."