Búið að rekja bloggfærslur um nauðgun og skotárás

Frásagnir um skotárás og nauðgun sem birtist á íslenskri síðu á netinu í vikunni fóru strax til rannsóknar hjá lögreglunni. Haft var upp á Ip-tölum og viðkomandi tölvur voru staðsettar.

Á forsíðu Fréttablaðsins í morgun er sagt frá því að lögreglan rannsaki veffærslur þar sem fimmtán ára stúlka lýsir nauðgun af hendi fósturföður síns og unglingspilts sem hótar að skjóta bekkjarfélaga sína.

Að sögn Friðriks Smára Björgvinssonar, yfirlögregluþjóns rannsóknardeildar lögreglunnar á höfuðborgarsvæðinu, var hafist handa við að útvega svokallaðar Ip-tölur í kjölfar málanna tveggja. Ip-tölur eru einkennistölur tölva og með því að hafa upp á þeim er hægt að sjá úr hvaða tölvum færslurnar koma.

Báðar færslurnar eru skrifaðar á vefsvæðið, www.blabla.is.

Í öðru tilvikinu lýsir fimmtán ára gömul stúlka því hvernig fósturfaðir hennar nauðgaði henni á meðan móðir hennar lá á spítala. Einnig kemur fram að hann hafi misnotað hana kynferðislega í nokkur ár og eru lýsingarnar nokkkuð nákvæmar. Greinilegt er að stúlkan óttast manninn og spyr lesendur síðunnar hvað sé til ráða.

Sú færsla kemur úr tölvu sem staðsett er í bæjarfélagi utan höfuðborgarsvæðisins og segir Friðrik Smári að staðarlögreglunni þar sem og barnaverndaryfirvöldum hafi verið tilkynnti um málið. Friðrik getur því ekki svarað frekar fyrir það mál.

Í hinu tilviku segir piltur í níunda bekk frá því að það sé einungis tímaspursmál hvenær hann skjóti alla bekkjarfélaga sína og sprengi sig síðan í loft upp í Alþingishúsinu. Sú færsla kemur úr tölvu á höfuðborgarsvæðinu. Verið er að vinna í því að ná tali af piltinum.