Nafnleynd umsækjenda ámælisverð

Álfheiður Ingadóttir, þingmaður Vinstri grænna, segir ámælisvert að umsækjendum um forstjórastöður opinbera fyrirtækja sé heitið nafnleynd. ,,Stjórnsýslan á að vera gagnsæ í orkufyrirtækjum í eigu almennings. Það eiga ekki að vera neinar undantekningar þar."

Umsóknarfrestur um stöðu forstjóra Orkuveitu Reykjavíkur rann út um miðjan ágúst og um helgina var forstjórastaða Landsvirkjunar auglýst til umsóknar. Í báðum tilfellum kemur fram í auglýsingu að farið verði með allar umsóknir sem trúnaðarmál. Upplýsingarfulltrúar fyrirtækjanna hafa upplýst í samtali við Vísi að nöfn umsækjenda verða ekki gerð opinber.

,,Það er allt í lagi að umsóknin sem slík sé trúnaðarmál en ég tel mjög óheppilegt og í rauninni fráleitt ef að trúnaður á að ná til þess hver sæki um þessi störf," segir Álfheiður.